Psa 39 | PONPDN | STEP | NGai kan, pwe i ender wia dip ki lo i. I pan sali pena au ai arain en me sapun o mi re i.

Psalms 39

1 NGai kan, pwe i ender wia dip ki lo i. I pan sali pena au ai arain en me sapun o mi re i.
2 I kadukiedier ai lokaia o nenenlar o solar inda duen peren a ai kalokolok lalaudalar.
3 Mongiong i karakaradar nan kapedi, o ma i pan tamanda mepukat, a rasong kisiniai lulada; i ap lokaia kida lo i.
4 Maing, kotin padaki ong ia, me maur i pan imwisokela, o imwi pan ai ran akan, me i pan samoer.
5 Mangi, ai ran akan dueta talap en pa en aramas re omui; o maur i likamata sota meakot mo ’mui. Melel aramas, me kin keleki pein i, kin dueta adiniai.
6 Re kin alialu sili rasong mota, re kin katoutouki pein irail dodok mal. Re kin nanak pena ap sasa, is me pan naineki.
7 Ari Maing, is me i en auiaui? I kaporoporeki komui.
8 Dore ia la sang dip ai karos, o kom der mueid ong, me pweipwei kan en kaurur kin ia.
9 I pan nenenla o sota sar pasang au ai, pwe kom kotin wiadar.
10 Kotin katukiedi omui kaloko ia; pwe ngai dupok kilar ai kalokolok pan lim omui.
11 Ma kom pan kaloke amen pweki dip a, mom a kaselel ap pan suedala likamada man en mot kangala. O meid mal aramas karos!
12 Maing kom kotin ereki ni kapakap, o mangi ai likwir, o der sapaimokid ni ai sangesang, pwe ngai sapwilim omui men kairu o pweledan omui wei men dueta sam ai kan karos.
13 Kom kotin muei sang ia, pwe i en kelailada, mon ai pan kokowei o solar mia.